Tidlegare program

Her får du ei lita oversikt over program frå tidlegare år.
Vi har tilrettelagt trykte program i PDF-format slik at det kan lastast ned og lesast i si heilheit på din eigen PC.

Program 2011

Vil du lese meir om programmet, kan du sjå på brosjyren som her ligg ved som pdf-dokument:

Last ned det trykte programmet (brosjyren) for 2011 som PDF-fil:					Program 2011.pdf

Prgram 2010

Kyrkjehola Kulturbeite inviterte Kenneth Ekornes til å vere vår musikarprofil i 2010 og vise oss litt av breidda i det han står for. Han fekk frie tøylar til å setje saman programma han skulle vere med i. Dette resultert i tre spennande konsertar.

Men før han kom i gong, opna sesongen jonsokaftan med ein vakker konsert – EARLY FOLK - med Lena Willemark, ein av Nordens fremste artistar innan folkemusikk og world music I lag med Svante Henryson – cello og Knut Johannesen – cembalo, sette ho ein kunstnarisk standard som stod seg sesongen ut, og som styret var særs nøgd med. På dette arrangementet var publikumsframmøtet brukbart, men vi skulle gjerne hatt langt fleire besøkande på mange av dei fantastiske framsyningane som vart presenterte.

I det neste arrangementet, Ekornes i 100, trollbattKenneth Ekornes eit ungdommeleg publikum med sine trommerytmar og sitt dataopptaksutstyr som fekk fram inspirerte komposisjonar og dansefot hos store og små. Eit absolutt høgdepunkt i år og i KKB si historie var Frode Fjellheim si arktiske messe Aejlies Gaaltije - den Hellige kilden m/ Frode Fjellheim - tangentar og vokal, Nils-Olav Johansen - gitar og vokal, Snorre Bjerck – perkusjon, Kristin Rustad Høiseth og Randi Lundemo – sang, Sturla Eide – fele.

Midt i juli kunne vi by påForfatteraften med Benny Andersen. Den danske bestseljaren fann og tonen med sitt norske publikum, som sette pris både på dikt og forteljingar. Konsertsesongen fortsette med to førestillingar der Kenneth Ekornes var sentral. The Brazz Brothers’ World Jazz, med godt besøk og god stemning, og Summer Samba (Samba de verão) Eit Brasilprosjekt med Kenneth Ekornes - perkusjon, Vera Regina Americo - sang, Andreas Aase og Tom Steinar Lund – gitar. Siste framsyninga for året var Nå - Hans Børli med kvinnehånd - Poesikonsert med Anne-Marit Jacobsen, Benedicte Maurseth - fele og Åsne Valland Nordlie – kveding. Utstillingane Bilde i svart/kvit grafikk v/Bjørn Brusdal og "Skimmer"- glasobjekt v/Anne Brit Krag fekk mykje god omtale og hadde brukbart besøk. Vil du lese meir om programmet, kan du sjå på brosjyren som her ligg ved som pdf-dokument:

Last ned det trykte programmet (brosjyren) for 2010 som PDF-fil:					Program 2010.pdf

Program 2009

Sesongen 2009 starta opp jonsokaftan med eit ”innkjøpt” program med songaren Sigvart Dagsland og pianisten Torjus Vierli. Rosekyrkja var fylt med meir enn 250 velnøgde tilhøyrarar. Dei to neste førestillingane var eigenproduksjonar. Først ein interessant, spennande og vakker presentasjon av salmediktaren Niels Olsen Svee med dyktige artistar med Sondre Bratland og Randi Lundemo som frontfigurar. Forfattaren Olav Mosdøl hadde laga manus med skodespelaren Trond-Ove Skrødal som forteljar. Idéen til førestillinga hadde Odd Johan Overøye, som også spelte i orkestereret i lag med Bergmund Skaslien og Andreas Aase. Vel 150 fekk med seg denne flotte framsyninga. Vi held fram med ”Perledryss” frå Nordahl Rolfsen si lesebok der skodespelaren Gøril Haukebø las utvalde tekstar og Marianne Stavseng med akkompagnatør Odd Johan Overøye framførte songar. Dette vart ei særs triveleg stund for dei 40 frammøtte i Løsetstova. Dei fleste publikummarane tilhøyrde genrerasjonen som hadde fått sitt første møte med litteraturen gjennom Nordahl Rolfsen si lesebok.

Vidare på programmet stod Tangofeber med den internasjonalt renommerte gruppa Tangueros del Norte. Dette programmet vart svært godt motteke av eit publikum på om lag 150 personar. Den ungdommeleg sjarmen til medlemmene i orkesteret og deira mogne og virtuose musikalitet fjetra tilhøyrarane. Seinare i juli skulle vi ha besøk av den kjende føredragshaldaren og presten Karsten Isachsen som skulle kåsere om Hverdagens vakkerhet.To timar før førestillinga måtte han melde sjukdomsavbod. Dette er første gong KKB avlyser ei førestilling.

Vår lokale artist Hilde Louise Asbjørnsen held så konsert i Rosekyrkje med sin trio, Programmet ”Ein haltande sommarvals” vart omtala som eit høgdepunkt i KKB si historie. Om lag 150 tilhøyrarar fekk ei minnerik oppleving denne kvelden.

Dagen før olsok kom Tone Hulbækmo og Hans Fredrik Jacobsen med eit program som var spesielt laga for KKB med musikk gjennom tusen år. Sidan olsok var så nær og Rosekyrkja arena, bar musikkvalet bere preg av dette. Dette vart ei særs vakker og fin førestilling som gledde eit litt for fåtallig publikum. Knapt 100 tilhøyrarar var samla i Rosekyrkja

Same dagen opna vi kunstutstillinga ”Lys langs fjorden” med bilete av Ørnulf Opdahl. Vi var glade for å kunne presentere ein av våre store samtidskunstnarar i jubileumssesongen. Om lag 800 personar var innom utstillinga, som fekk mange godord frå dei besøkande. 21 bilete vart selt.

Sesongen vert avslutta 9. august ved at utstillinga blei tatt ned og at Audhild Gregoriusdotter Rotevatn gav oss nokre historier frå Noreg, som ho har kalla ”Kvardagsglimt”. Om lag 30 personar fann vegen til Løsetstova og opplevde ei svært triveleg stund.

Last ned det trykte programmet (brosjyren) for 2009 som PDF-fil:					program 2009.pdf

Program 2008

Styret for Kyrkjehola Kulturbeite ønskte at programmet for 2008 skulle ha eit innhald der kunstuttrykk frå andre land vart sameina med det norske. Programmet opna i midten av juni med minioperaen Prinsessa på Selja av Eyvind Skeie og Odd Johan Overøye, som fortel om irske Sunniva sin lagnad på øya Selja. Nesten 40 deltakarar med Sara P. Eriksson og Magne Fremmerlid i hovudrollene, gav ei fullsett kyrkje ein stemningsfull og mektig start på sesongen.
Den 22. juni tolka Knut Reiersrud Olav H. Hauge i førestillinga Eit korn av salt, som var utfoma og produsert av Kyrkjehola Kulturbeite i samråd med Reiersrud. Tilbakemeldingane vitna om eit særs vellukka opplegg.
På konserten Magisk nyckelharpefusion med Emilia Amper Trio fekk vi høyre både folkemusikk og komposisjonar av Emilia. Ein triveleg sommarkveld i Rosekyrkja!
Dagen før olsok opna dei to kunstutstillingane Erindringsbilder ved Marianne Boberg og Hyllest til det norske lyset ved den nedelandske målaren Henk Lassche. Desse utstillingane kunne sjåast fram til 10. august og hadde godt besøk. Nok eit programinnslag med internasjonal tilknyting vart vist den same kvelden. Ohne Sentimentalität, songar av Hanns Eisler og Bertolt Brecht, vart framført av Anne-Lise Berntsen og Trygve Brøske Ensemble. Førestillinga var ei stor oppleving, som fleire burde ha fått med seg.
Full kyrkje var det tre dagar seinare på konserten GammalGrass med Stian Carstensen, Ola Kvernberg og Ole Morten Vågan. Deira improviserte og humørfylte framføring av ei samansmelting av gammaldans og bluegrassmusikk (og mykje meir), fall tydelegvis i smak.
Det gjorde også den sceniske konserten Ljod med Marilyn Mazur, Ruth Wilhelmine Meyer, Agnes Buen Garnås og Helen Davies Mikkelborg, som avslutta arrangementa i Rosekyrkja.
Programmet for 2008 vart avslutta i 10. august Løsetstova med kåseriet Absolutt Sunnmøre ved Kjetil Tandstad og ved at utstillingane vart stengde.
Vel 900 løyste billettar på førestillingane i Rosekyrkja og Løsetstova i tillegg til alle som fekk oppleve utstillingane i Prestestova og Løsetstova.

Last ned det trykte programmet for 2008 som PDF-fil:					Program 2008.pdf

Program 2007

Kyrkjehola Kulturbeite kunne også sommaren 2007 tilby eit breitt spekter av kulturopplevingar i våre heilt spesielle lokalitetar. Sesongen starta 10. juni med Songen langs fjorden - ein konsert i samarbeid med Storfjordens venner Ålesund Kammerkor med solistar og orkester presenterte Odd Johan Overøye sine arrangement av songar frå CD-en "Songen langs fjorden". Både dette og dei tre neste arrangementa hausra stor fagnad og var svært godt besøkte. Gullalder m/ Toralv Maurstad og Espen Skjønberg baud på litterære perler som mange kjende att frå lesebøkene til Nordahl og Rolfsen og ikkje minst på eit møte med legender innen norsk scenekunst. Midtsommarkveld med Ole Paus viste også at denne artisten sitt ry er velfortent. Med humor, beisk samfunnskritikk og poesi tok han publikum med storm. Det gjorde også Jo Nesbø og Lars Jones med sine fabuleringar og musikalske framføringar- om jenter som kommer og jenter som går...

Harpeberget -Multimedial installasjon - ved Odd Johan Overøye, Marit Kaldhol, Arne Nøst og Øyvind Driveklepp – er den største satsinga til Kyrkjehola Kulturbeite. Installasjonen bygg på ei lokal segn og gav vakkert og mystisk grunnlag for mange refleksjonar.I Løsetstova fekk vi oppleve grafikkutstillinga Strukturar som presenterte bilete av Martin Due med motiv frå naturen.A Corda -Birgitte Stærnes (fiolin) og Martin Haug (gitar) - presenterte musikk med søramerikansk lidenskap og wienereleganse - eit musikalsk høgdepunkt i sesomgen.Med ein barndom i botnen fekk vi eit litterært møte med far og dotter Vidar og Maria Parr som skapte ei triveleg stund for publikum i Løsetstova.Programmet for 2007 vart avslutta med Kammermatiné i Grieg-året m/instruktørar og unge talent frå “Borg-kurset”.

Last ned det trykte programmet for 2007 som PDF-fil:					Brosjyre 2007.pdf

Program 2006

Sommaren 2006 vart ein stor suksess for Kyrkjola Kulturbeite. Aldri har så mange sett førestillingane våre. Det byrja med historisk foredrag ved Berge Furre. To høvdingar i Norden (Evert Taube og Erik Bye) vart presenterte av Lars Klevstrand med Audun Skorgen og Odd J. Overøye som medmusikantar. Kyrkja vart for lita for Jakob Sande & Jon Eikemo, trur eg...Ei markering av 100-årsjubileet for Sande sin fødsel. Utstillinga Keramikk og skulptur viste arbeid av Leon Roald. Quartet Lavender spelte internasjonal kammermusikk før SKRUK a cappella fylde kyrkja både med publikum og korsong. Ei sterk oppleving var Haugtussa - Eit musikalsk og intenst møte med Garborg ved Karoline Isaksen, Jo Inge Nes (perkusjon) og Håvard Sveås (tangentar). Maange fekk og med seg avslutninga "Omreisende malersvende og stadsmusikanter" - Rosekyrkja i eit kunsthistorisk og musikalsk perspektiv med Gunnar Danbolt og Erling With Aasgård.

Last ned det trykte programmet for 2006 som PDF-fil:					prog2006.pdf

Program 2005

I 2005 hadde vi programinnslag med Brasiliansk musikk ved Tristan og Fellina (Kristian Skårbrevik og Ingeborg Tornes), Ola Bremnes med band med sin konsert "Frå Golfstraumen", "I skuggen av Grieg" - ein konsert med Harald Bjørkøy, Marianne Ravn og Odd Johan Overøe, Eldar Parr med "Vandrarane" stilte ut litografiar, Kjell Stig Amdam med "Gull og himmelblått" stilte ut måleri, vi hadde kåseriet "Fjøyra som dreiv" med Ingebjørg Røyrhus Riste, Litteraturkveld med tittelen "Meir enn Berre ein hund" der Ingar Sveen las Per Sivle, Svein Tindberg las, fortalde og leikte med tekstar frå bibelen i forestillinga "Som skrevet står", og vi avslutta med konserten "Songar utan ord" med Eero Voitk og Odd Johan Overøye.

Last ned det trykte programmet for 2005 som PDF-fil:					Program_2005.pdf

Program 2004

Sommaren 2004 var året for den store hesteferda til Romsdals Marked på garden Devold i Rauma. KKB markerte dette med eit historisk foredrag ved eigaren av garden, Per Devold. Sesongen starta romantisk med nygifte Magne Fremmerlid og Charlotte Fongen, som gledde publikum med kjærleiksarier frå operalitteraturen. Odd Johan Overøye stod for tonefølgje. Eit nytt høgdepunkt var besøket til Per Arne Glorvigen med sin bandoneon solo. Olsokgudsteneste med gammal liturgi var dette året lagt inn i programmet. Nils Beite leia gudstenesta. To søstrer frå Stordal, Randi Mari og Aina Haugen, var utstillarar. Eit triveleg og humoristisk møte med forfattaren Ragnar Hovland og flott arrangert folkemusikk med Sturla Sundli og Andreas Aase fylte lokala i Prestestova og Løsetstova.

Last ned det trykte programmet for 2004 som PDF-fil:					Program 2004.pdf

Program 2003

Sommarprogrammet 2003 starta med eit møte med diktaren Edvard Hoem. Dotra Kristine og Odd Johan Overøye var med i framføringa. Stordalssalmen, tekst Hoem og musikk Overøye, vart urframførd. Astor Furseth vitja KKB med opplesing frå sine noveller. Utstillinga dette året var relatert til 400-årsjubileum for den offentlege helsetenesta. Eva Mørkeseth framførde Snøhvit og de syv dvergene på ein måte som engasjerte dei yngste. Kirsten Ludvigsen viste oss at dei også i eldre tider kosa seg med snop. Sopranen Victoria Nava i lag med Trygve Brøske framførde bøner og Maria-hymner frå opera og oratorier. Sesongen vart avslutta av Harald Grytten som snakka om kunst og kunstnarar på Sunnmøre.

Last ned det trykte programmet for 2003 som PDF-fil:					Program 2003.pdf

Program 2002

I 2002 opna KKB programmet med besøk av Henning Sommero med gjest på jonsokafta. Stemninga stod høgt i taket då Hans Hyldbakk og andre sine tekstar vart framført i Sommero sine vakre arrangement. Torunn Stavseng framførte fleire av Bach sine sonater for solo cello. Utstillarane dette året var Anne Sara Loe og Ingunn Dahlin. Det historiske innslaget stod Odd Sørås for ha då han fortalde om dramaet på Innfjordfjellet der ei kvinne vart myrda. Hege Langhaug Berli deltok med musikkinnslag. Maria Holand Tøsse og Elisabeth Nilsen hadde program for dei minste. "Mildt regn" kalla Gøril Haukebø, Odd Johan Overøye og Stian Omenås si førestilling spesialprodusert for KKB med tekstar av Haldis Moren Vesaas og musikalske improvisasjonar.

Last ned det trykte programmet for 2002 som PDF-fil:					Program 2002.pdf

Program 2001

Erfaringane frå oppstartsåret var så gode at det vart bestemt å vidareføre sommarprogrammet i KKB i 2001. Irsk reis med Gunhild Marie Roald opna sesongen. Her fekk vi oppleve Irland i tonar og forteljing. Arne Ruset vitja Prestestova med utdrag frå sitt forfattarskap. Utstillarane i 2002 var to som er busette i Ørskog: Asgeir Kvernberg og Liv Dysthe Sønderland. Randi Bjørlykke fortalde så smått og stort frå det ho kom over i sitt arbeid med ættesoga for Stordal. Vidar Underseth deltok med musikkinnslag. Lokalhistorisk innslag dreia seg om "Ull". Kirsten Ludvigsen m.fl. viste korleis ulla vart brukt i eldre tider og det vart synt fram ei utstilling med tøy og klede laga av ull. Skodespelarar frå Teatret vårt hadde eventyrstund for dei minste. Lina Sandell i ord og tonar vart framført av Åsa Forngren, Kirsti Pedersen Haugen og Jens Arne Molvær.

Last ned det trykte programmet for 2001 som PDF-fil:					Program 2001 s-1.pdf Program 2001 s-2.pdf

Program 2000

Det var med spenning KKB kunne presentere sitt første program i 2000. Odd Johan Overøye akkompagnerte Ann-Mari Edvardsen i ein musikalsk sommarbukett. To førestillingar vart gitt i Prestestova. Kirsten Ludvigsen m.fl. gjenskapte livet på på ein sunnmørsgard slik det kunne vere i eldre tider. Tre utstillingar vart vist. Først viste Neil Davey foto frå Skottland. Seinare stilte Kjell Gunnar Overøye ut veggrelieff i metall og Hallvard Hatlen måleri og grafikk. Forfattaren Marit Kaldhol las frå sine diktsamlingar med tittelen "- kvite kråker over bakarens hus". Teatret Vårt gjesta med barneførestilling der Gøril Haukebø, Vivi Sunde og Ane Dahl Torp tok del. Til slutt gav Jostein Fet portrett av kvedarar, spelemenn og diktarar frå storfjordbygdene. Han spelte sjølv fele og hadde i tillegg med seg Ingunn Linge Valldal for å framføre kved og slåttar.

Last ned det trykte programmet for 2000 som PDF-fil:					Program 2000.pdf