Kjære publikum!

Vi håper du er blant dei som har gleda deg til ein ny sesong med Kyrkjehola Kulturbeite – og at du, når du ser kva vi har å by på denne sommaren, blir ofte å sjå på arrangementa våre.

I fjor hadde vi for første gong ein eigen festivalartist. Då valde vi sykkylvingen Kenneth Ekornes. Det vart ein suksess! Også dette året har vi valt ein sunnmøring som festivalartist: Knut Ivar Bøe, godt kjent lokalt, men også velrennomert i større krinsar, både nasjonalt og internasjonalt. Han vil ha ein finger – eller rettare sagt eit trekkspel – med i fleire av konsertane våre denne sesongen. Først med Fotspor – ein konsert i Rosekyrkja der han har med seg fleire av dei musikarane han har jobba mest med i karrieren sin. Vi møter han att både i kappspel på puben på Nilsgardstunet seint på kvelden den 8.juli og sist, men ikkje minst saman med Elias Akselsen på Dyrkornkaia sjølvaste olsokaftan.

Også denne sesongen kan Kyrkjehola Kulturbeite by på urframføringar. Vi gler oss over å kunne presentere Odd Johan Overøye sin klavertrio A Little December Music. Spennande skal det også bli å lytte til nye arrangement til kjende og kjære songar- ekstra kjekt er det for oss å få Helene Bøksle til å synge saman med mange lokale songtalent. Slik vil vi ivareta eitt av dei viktige føremåla til Kyrkjehola Kulturbeite: Stimulere til nyskapande og kreative møte mellom ulike kunstformer og mellom profesjonelle og lokale utøvarar.Velkommen til ein ny og minnerik sommar i Kyrkjehola Kulturbeite!

Med helsing frå styret